Gostūs Ilmārs Mežs, kurs vairuoku godu garumā arhiva materialūs pietejs latgalīšu uzvuordus. Kūpā ar cytim pietnīkim jis sarakstejs gruomotu “Latviešu uzvārdi arhīvu materiālos. 1. sējums. Latgale”, tuos pamatā 1935. goda tautys skaiteišonys dati. Gruomotā varēs atrast ap 4000 uzvuordu, tū izplateibu, daļai uzvuordu byus ari skaidruojums par vuorda izcelsmi. Interesants ir fakts, ka Latgolys latvīšim pyrmajim suoka dūt uzvuordus, tys beja jau 17. godu symtā, puorejā Latvejis teritorejā latvīši pi uzvuordim tyka dažus godu symtus vāluok.

Pīduovojam klauseituojim puorbaudeit sovys zynuošonys latgalīšu rokstu volūdā, kas ir viesturisks latvīšu volūdys paveids. Aicynojam kūpā ar myusim uzraksteit diktatu latgaliski! Fragmentu nu Ilzis Spergys gruomotys “Dzeiveiba” skaita jaunatnis lītu specialiste Leila Rasima. Pīraksteitū tekstu var puorbaudeit Latgalīšu kulturys ziņu portalā lakuga.lv. Diktata teksts sastuodeits, īvārojūt Vaļsts volūdys centra 2007. godā apstyprynuotūs Latgalīšu raksteibys nūsacejumus.