Latgalīšu literaturys raidīroksts “Puslopys” ir myusdīnu latgalīšu literaturys puslopu puorškūrsteišona – apsarunuošona ar autorim par raksteišonu, volūdu, kasdīnu i dzeivi kai taidu. “Puslopys” aicynoj īsaklauseit ari latgaliski pīraksteitūs dorbu voi tūs fragmentūs pošu autoru skaitejumūs, taipat kotrā sasatikšonys reizē tūp vīna jaunys dzīsmis skice ar satyktuo autora tekstu.

Itymā reizē sasateikam ar Oskaru Seikstu.

Oskars Seiksts, ka tai var saceit, ir pats teiksmainuokais myusdīnu latgalīšu literaturys autors – Oskara Seiksta ītekmi sovu dorbu topšonā atzeimej vairuoki latgaliski rakstūši autori. Sandra Ūdre Seikstu raksturoj kai sova laika spūdruokū figuru storp autorim, maksimalistu volūdā i huliganu tradiceju lauzšonā. Spylgta debeja deveņdesmytūs godu vydā kūpā ar Valentinu Lukaševiču, izdūdūt dzejis kruojumu “Seppuku iz saulis vādara” (1995) i postmodernisma romanu “Valerjana dzeive i redzīni” (1996), revolucionaruokuo latgalīšu literaturys kūpkruojuma “Pagrauda” (1999) sastateišona, tod iz ilga nūīšona paceli nu raksteišonys i publiskys dzeivis, bet izaver, ka 2021. godā sagaideisim nu autora puorsteigumu i koč kū jaunu.

Ar latgalīšu literaturys autorim raidīrokstā “Puslopys” sasarunoj muzikis, viesturnīks i raidejumu vadeituojs Arņs Slobožanins i latgalīšu volūdys entuziaste, marketinga specialiste Edeite Husare.