Latgalīšu literaturys raidīroksts “Puslopys” ir myusdīnu latgalīšu literaturys puslopu puorškūrsteišona – apsarunuošona ar autorim par raksteišonu, volūdu, kasdīnu i dzeivi kai taidu. “Puslopys” aicynoj īsaklauseit ari latgaliski pīraksteitūs dorbu voi tūs fragmentūs pošu autoru skaitejumūs, taipat kotrā sasatikšonys reizē tūp vīna jaunys dzīsmis skice ar satyktuo autora tekstu.

Itimā reizē sasateikam ar Aldi Bukšu.

Aldis Bukšs ir pyrmuo detektivromana latgaliski autors i reizē debitants latgalīšu literaturā kai taidā. Juo bibliografeja cikom nav cīši gara – 2015. godā izguoja debeja kriminalromans “Parādu piedzinēji” i par reizi izapeļneja skaiteituoju i kritiķu atzineibu, bet 2020. goda golā izdūts “Brāļi”/”Bruoli” – obejuos latvīšu volūdys rokstu tradicejuos raksteits dorbs –, i kai par Aldi saceja literaturzynuotnīks Valentins Lukaševičs, saleidzynojūt ar šaha terminologeju, par reizi ar itū jis beja nu pešku damkuos!  Aldis Bukšs īt nu Zīmeļlatgolys, Baļtinovys, niu dzeivoj i struodoj Reigā, napagaisynojūt ari interesi i īsaisti sabīdryskajūs procesūs, kas saisteiti ar latgaliskū kulturu.

Ar latgalīšu literaturys autorim sasarunoj muzikis, viesturnīks i raidejumu vadeituojs Arņs Slobožanins i latgalīšu volūdys entuziaste, marketinga specialiste Edeite Husare.