Latgalīšu literaturys podkasts “Puslopys” ir myusdīnu latgalīšu literaturys puslopu puorškūrsteišona – apsarunuošona ar autorim par raksteišonu, volūdu, kasdīnu i dzeivi kai taidu. “Puslopys” aicynoj īsaklauseit ari latgaliski pīraksteitūs dorbu voi tūs fragmentūs pošu autoru skaitejumūs, taipat kotrā sasatikšonys reizē tūp vīna jaunys dzīsmis skice ar satyktuo autora tekstu.

Itimā reizē sasateikam ar Anneli Slišāni.

Annele Slišāne ir tekstilmuokslys i literaturys projekta #100dečiLatvijai, kas eistynuots gon gruomotā, gon izstuodē, gon ari stuostūs socialajūs teiklūs, autore. Saiminīkoj Viļakys nūvoda Zeļčūs, ir Zīmeļlatgolys īvarojamuo folklorys vuocieja, literata i sabīdryskuo darbinīka Ontona Slišāna meita, bet decembra suokumā uzvariejuse pyrmajūs Latgolys prozys skaitejumūs ar stuostim nu dreiži gaidomuos gruomotys “Tuoraga stuosti”.

Ar latgalīšu literaturys autorim sasarunoj muzikis, viesturnīks Arņs Slobožanins i marketinga specialiste, latgalīšu volūdys popularizātuoja Edeite Husare.