#puslopys EVIKA MUIZNIECE – par tīšumu, vulgarim barbarismim i klasikys interpretiejumim

Latgalīšu literaturys raidīroksts “Puslopys” ir myusdīnu latgalīšu literaturys puslopu puorškūrsteišona – apsarunuošona ar autorim par raksteišonu, volūdu, kasdīnu i dzeivi kai taidu. “Puslopys” aicynoj īsaklauseit ari latgaliski pīraksteitūs dorbu voi tūs fragmentūs pošu autoru skaitejumūs, taipat kotrā sasatikšonys reizē tūp vīna jaunys dzīsmis skice ar satyktuo autora tekstu.

Itūreiz raidīrokstā „Puslopys” sasateikom ar spylgtu personeibu i raksteituoju – Eviku Muiznieci, agruok zynomu ari ar pseidonimu karonhisake. Dzeja, proza, lugys, tulkuojumi ir Evikys raksteišonys puse, bet vēļ ir ari muoksla, aizaraušona ar dažaidu video formatu dorbu produciešonu i niu ari latvīšu volūdys i literaturys vuiceišona školā projektā „Mācītspēks”.

Karonhisake ir Evikys suokuma perioda kai dzejneicys pseidonims, kod vydsškolā jei suoce raudzeit raksteit i, dzejnīka Valentina Lukaševiča mudynuota, ari publicēt sovys dzejis ailis. Kai zyna skaidruot dzejneica i niu jau ari prozys autore poša, vuords ‘karonhisake’ nu indiaņu volūdys tulkojams kai ‘tei, kas meklēj dabasūs’. Tūlaik jei ari poša bejuse romantiskuoka i ni tik skorba. Jaunajai autorei pīaugūt i atsateistūt, pseidonums itūšaļt ir nūlykts molā i ari dzeja drupeit ir palykuse ūtrā planā.

Niu Evika vaira pīsavārsuse prozai i juos dorbs „Daina, kas tev vainas” pārnejuo goda golā konkursā “Latgolys prozys skaitejumi” beja lobuokūs vydā i izapeļneja atzineibu par dzeivū skaitejumu i labi veiduotim dialogim. Evikys dorbus atškir vysā skorba i taišna volūda i šaļtim ari pikanta vuordu izvēle. Poša Evika kai tūpūšuo latvīšu volūdys školuotuoja skaidroj, ka tei ir vulgaru barbarismu izmontuošona, pībylstūt, ka sevkurs cylvāks sovā runā taidus sovu reizi lītoj. Ari, struoduojūt pi dažaidu cytu projektu, Evika īsastuoj par sovom vierteibom, ir taišna i „namaun pa straumei”.

Evika atkluoj – itūšaļt jei struodoj pi romana, bet juos vuords saistuos ari ar tulkuojumim. Jei ir tulkuojuse taidys klasikys dorbus latgaliski kai „Alise Breinumu zemē” i „Mozais priņcs”.

Ar latgalīšu literaturys autorim sasarunoj muzikis, viesturnīks Arņs Slobožanins i marketinga specialiste, latgalīšu volūdys popularizātuoja Edeite Husare.