Latgalīšu literaturys podkasts “Puslopys” ir myusdīnu latgalīšu literaturys puslopu puorškūrsteišona – apsarunuošona ar autorim par raksteišonu, volūdu, kasdīnu i dzeivi kai taidu. “Puslopys” aicynoj īsaklauseit ari latgaliski pīraksteitūs dorbu voi tūs fragmentūs pošu autoru skaitejumūs, taipat kotrā sasatikšonys reizē tūp vīna jaunys dzīsmis skice ar satyktuo autora tekstu.

Itimā reizē sasateikam ar Raibū.

Literaturā jis ir pazeistams kai Raibīs, bet uorpus tuos – kai Oskars Orlovs. Kod dūmovom par Raibū, saprotom, ka jis ir vyss! Roksta prozu, roksta dzeju, paraudzejs rūku dramaturgejā. Raibīs ir ari karikaturists i sovulaik poetiskuos roka apvīneibys “Kapļi” bolss. Bet, ka stuosta par Oskaru, tod juoīsadzilinoj ari masera profesejā i latgalīša dzeivē uorpus Latgolys.

Ar latgalīšu literaturys autorim sasarunoj muzikis, viesturnīks Arņs Slobožanins i marketinga specialiste, latgalīšu volūdys popularizātuoja Edeite Husare.