#puslopys VALENTINS LUKAŠEVIČS - svareigi pīfiksēt pyrmū īspaidu

Latgalīšu literaturys raidīroksts “Puslopys” ir myusdīnu latgalīšu literaturys puslopu puorškūrsteišona – apsarunuošona ar autorim par raksteišonu, volūdu, kasdīnu i dzeivi kai taidu. “Puslopys” aicynoj īsaklauseit ari latgaliski pīraksteitūs dorbu voi tūs fragmentūs pošu autoru skaitejumūs, taipat kotrā sasatikšonys reizē tūp vīna jaunys dzīsmis skice ar satyktuo autora tekstu.

Itimā reizē sasateikam ar Valentinu Lukaševiču.

Literaturzynuotnīks, rakstnīks, scenareju autors, nūvodpietnīks i dzejnīks Valentins Lukaševičs zyna kaidi ir batvini, kai raksteits boltim burti i niu ari deļ kuo pādi navā svāti – tai varātu saceit par 2021. goda suokumā izguojušuo dzejis kruojuma “Pādi navā svāti” autoru. Autors soka, ka itys kruojums nūslādz vysu tetralogeju “Ceļš”, kurā da ituo izdūti kruojumi: “Kuozynda” (2005), “Vot taidi vot i batvini” (2006) i “Bolti burti” (2011). Sovu ceļu latgaliskajā literaturā Lukaševičs izsuocs kūpā ar Oskaru Seikstu 1995. godā ar stuostu dzejā “Seppuku iz saulis vādara” i 1996. godā izdūtū romanu “Valerjana dzeive i redzīni”. Taipat ar Valentina Lukaševiča stuostim kūpā var brist leluokus i mozuokus Latgolys ceļus, stuosteit vysai Latvejai par cytaidi latvyskū i kotru nedeļu izzynuot Rēzekni i tuos apleicīni.

Ar latgalīšu literaturys autorim sasarunoj muzikis, viesturnīks i raidejumu vadeituojs Arņs Slobožanins i latgalīšu volūdys entuziaste, marketinga specialiste Edeite Husare.