Rēzeknis nūvoda Kaunatys pogostā "Akminīši" ir vīta, kas ar sovu energetiku i iteinis saiminīkim daudzu godu garumā puļcēja vysaidys radūšuos personeibys na tikai nu Latgolys, bet ari puornūvodu i cytom pasauļa vaļstim. Leidz 2018. goda vosorai ite dzeivuoja Latvejis kulturys fonda kūpys "Pūdnīku skūla" dybynuotuojs, keramikis Evalds Vasilevskis. Piec Evalda nūīšonys myužeibā sāta i saimisteiba kaidu laiku natyka apdzeivuota. Niu, piec kaida ilguoka paceli byušonys laika, ite iz dzeivuošonu i saimnīkuošonu ir atsagrīzuse Evalda sīva Evija Vasilevska ar bārnim. Raidejumā ar muokslys zynuotneicu i keramiki Eviju Vasilevsku runuosim par juos nuokūtnis īcerem saisteibā ar aizsuoktūs kusteibu turpynuojumu "Akminīšūs" i vītys puordzimšonu jaunā gaismā.

"Vysaida veida lītys, dūmojūt iz prīšku, tiks saisteitys ar muolu i rodūšu cylvāku kūpā byušonu. Varbyut drupeit cytaiduokā veidā nikai tys beja sovulaik, jo kotrys cylvāks dzeivē koč kū dora drupeit cytaižuok. Es kotrā ziņā naraudzeišu atkuortuot tū, kū darieja Evalds...Vuicūs struoduot ar muolu i tū vysu dareit, lai gon maņ nu vāruošonys beja daudzi kas saprūtams i skaidrys, kaidā veidā tys vyssnūteik. Vyss ir procesā. Lānai."

Evija atkluoj, ka Evalda Vasilevska darbineicā jai ir plans izveidot keramikys galeriju, kur atsarostu gon Evalda i Latgolys vacmeistaru dorbi, meistara sovulaik konstruātuo i veiduotuo kuojmynamuo virpa, taipat ite varātum interesentiem ruodeit vysaidus vizualus materialus par keramiku.