Itūreiz raidejumā sasateikam ar tuo pyrmū vadeituoju, muziki i pasuokumu vadeituoju Aigaru Runči. Atsavērsim iz raidejuma „Kolnasāta” rasšonuos pyrmsuokumim, pīminēsim interesnatuokūs momentus, kai ari dazynuosim par cytom latgaliskom aktivitatem Aigara kasdīnā – tūlaik i niule.

„Maņ pateik byut mikrofona itymā pusē i veiduot raidejumus, vadeit, runuotīs ar cylvākim i dazynuot koč kū jaunu. Tei beja fantastiska sajiuta…”

Raidejums „Kolnasāta” Latvejis radejis 1 programā suoce skanēt 2012. goda rudinī, i Aigars Runčis ir naviņ vaira nikai trejus godus bejs par tuo vadeituoju, bet ari stuoviejs kluotu šyupeļam, kod vairuoki aktivī latgalīši kūpā sprīde par formatu i saturu.

„Napylni četri godi maņ ir paguojuši „Kolnasātys” zeimē. Cīši skaists, rodūšs i darbeigs pūsmys munā dzeivē, ir iz kū atsavērt, i ir lapnums par padareitū... Ir svareigi byut tam, kurš ir gotovs aizsuokt koč kū jaunu, puormeit formatu. Ari pyrma raidejuma „Kolnasāta”, saprūtams, raidejumi latgaliski ir skanējuši Latvejis radejā. Drupeit cytā formatā i izpiļdejumā, leidz ar tū, kod guoja pīduovojums aizsuokt itaidu raidejumu cyklu, tys beja koč kas jauns. Myusu pastatejums beja narunuot par Latgolu kai par kulturviesturisku vītu, objektu, kas vaira leidzynojās muzejam, kavejamīs atmiņuos, kai tī kas ir bejs, pīminim koč kaidys kulturys nūtikšonys. Runuot par Latgolu kai par dzeivu, aktivu vītu, kur vyss nūteik...”

Daudzi Aigaru nūteikti pīmiņ ari saisteibā ar juo muzykalajom aktivitatem grupys „Borowa MC” sastuovā, kas beja vīna nu pyrmūs latgaliski muzicejūšūs grupu, kas ar dzīsmi „Vysskaistuokajai meitiņai” izskanieja vysā Latvejā.

„Tys beja taids foršs vaicuošonys breids, kas tod ir juodora, kab koč kū taidu aizsuoktu i kai juodora. Pīmiņu i valku paralelis ar tū pošu muzyku latgaliski. Sovulaik, kod maņ beja 17 ci 18 godu i mums grupā „Borowa MC” ari beja forša komanda, beja Ingars Gusāns ar sovu pīredzi, Guntra ar sovu rodūšū dzierksti. Es koč kur valku paralelis, jo ari tūlaik mes suocem foršu procesu, kas aizguoja tuoļuok... Prūtams, mes nabejom pyrmī i vīneigī, kas dzīduoja latgaliski, bet mes bejom pyrmī, kam saguoja uzrunuot, sasnēgt ci satrycynuot vysu Latveju. Par tū, kai tai saguoja, mes asam dūmuojuši ari grupā. Tys nūteikti beja apstuokļu kūpums i sakriteibys. Bejom eistajā vītā i eistajā laikā, ar eistū dzīsmi, steigom, attīksmi i sajiutu i mums saguoja... Kūpā saguoja cīši skaisti i jaudeigi, paruodejom, ka latgaliskais var byut moderns, stileigs i aktuals, ka tei ir pylnvierteiga volūda, pylnvierteigs izteiksmis veids. I niule jau piec aptyvai pīcpadsmit godu tys jau ir koč kas pošsaprūtams, tūlaik tai nabeja. Par tū, par latgalīšu volūdu vaira smējēs, i smējēs na ar mums, kū niule bīži viņ dora, bet tūlaik smējēs par mums. I tys, kū mes izdarejom, paruodejom, ka tys nav nikas smīkleigs, bet cīši skaists, lirisks, aktuals i muzykals.”

 

***

29. septembra piecpušdinē, Mikeļdīnā, Laura Sondore-Strode beja nūbraukuse iz Roberta Mūka muzeju Gaļānūs, kab pīsadaleitu Ivetys Seimanovys i Maritys Vilcinis dybynuotuos bīdreibys  „Latgolys etnografisko viestnīceiba” darbeibys atkluošonys nūtikšonā. Laurys sagataveitajā sižetā klausitēs vaira par pošu nūtikšonu, jaunū bīdreibu i tuos darbeibys mierkim.

 

 

***

Sovpus vuordineicā Ilze Sperga i Arņs Slobožanins stuosteis par vuordu Vaļa. Vaļa kai sīvītis vuords ci vareiba koč kū dareit, vīna nu breiveibys izpausmu.