Latgolā dzymušuos dzejneicys Bronislavys Martuževys dzeivis stuosts i juos dzeja, dīnysgruomotys i dzīsmis paruoda vysaidus viesturis pūsmus. Kab saglobuotu itū juos davumu Latvejis i Latgolys kulturā, bīdreiba „Muzikālais teātris-studija „Baltie lāči” izstruoduojuse gruomotu „Broņislavas Martuževas likteņgaitu klade”, kas niu jau nūdūta drukai i pavysam dreiži tiks ari pi sovu skaiteituoju.

Lubuona nūvoda, Indrānu pogosta „Duorzeņūs”, kur atsarūn pyrma drupeit vaira nikai diveju godu izveiduotuo „Bronislavys Martuževys dzejis kliets”, Ēriks sasatyka ar fonda „RAKSTĪTĀJA” vaļdis prīšksādātuoju Annu Eglienu i muziki, grupys „Baltie lāči” līderi Andri Baltaci, kab apsarunuotu par jau pīsauktū gruomotu, Bronislavys Martuževys davumu Latvejis i Latgolys kulturtelpā, likteņgaitom, dzeivi pagreidē i Sibirī, partizanim, tīsu i vysa kū cytu pīdzeivuotū.

 „Juos dzeja nav tikai dzeja, tei ir liktiņs – juos liktiņs, tautys liktiņs.”