Itūreiz braucam gostūs iz z/s "Liepkalns" Rēzeknis nūvoda Iļžukolna pogostā. Ar tuos saiminīkim Jūliju i Alekseju Danilinim runojam par biologiskū saimnīkuošonu, puortykys puorstruodi i produkcejis realizacejis īspiejom vītejā tiergā, latgalīšu volūdys izmontuošonu marketingā i kasdīnā.

Aleksejs stuosta, ka ite ir tei vīta, kur jis pats ir izaudzs i nu mozu dīnu struoduojs vysus lauku dorbus kūpā ar vactāvu. Tai pamozam ‘svātdīņu saimisteiba’ niu ir izauguse. “Apstruodojam 150 h zemis, i pādejūs godūs asam nūpītnai aizadūmuojuši par tū, ka vajag dabuot pīvīnuotū vierteibu sovam dorbam i saražuotajai produkcejai. Tai aizguojom leidz tam, ka niu jau puorstruodojam sovus saaudzētūs gryudus tepat, iz vītys.”

Sovpus sīva Jūlija, kura ir Rēzeknes piļsātys kulturys i turisma centra direktore, veiram saimisteibys dorbūs vaira suokuse pīpaleidzēt viņ pādejuo goda laikā, kod saimē pīdzyma ūtrais dāls. “Maņ niu ir dekreta atvaļynuojums i es izmontuoju itū īspieju pīsabīdruot Aleksejam. Radzūt ar kaidu gondarejumu i mīlesteibu jis audzej sovus gryudaugus, i jis piec izgleiteibys ir vidis inženers, kurš īsastuoj par vidis aizsardzeibu. Deļ tuo jam tys vyss ari tik labi saīt, jo, biologiski saimnīkojūt, nimoz nav tik vīglai izaudzēt gryudus. Jam saīt, jo jis pīlītoj praksē sovys zynuošonys.”

Jūlija i Aleksejs stuosta, ka dorba process saimisteibā ir piec īspiejis mehanizāts i jim nav struodnīku, bet dorbūs cīši paleidz vysa saime, tymā vydā ari vacuokais dāls Ivans, kuram niu ir 13 godu. Aleksejs pats pyrma puora godu aizguoja nu dorba Lauku atbolsta dīnastā i suoce arviņ vaira atteisteit sovu saimisteibu dzymtys sātā Rēzeknis nūvoda Iļžukolna pogosta “Kļasicā”. “Pryncypā es izaugu iz ituos zemis, kūpā ar vactāvu ite struoduoju vysu bierneibu, piec tam aizskrieju iz piļsātu, pabraukuoju pa uorzemem i tod beja sajiuta, ka vys tik mani valk atpakaļ iz iteini. Lauku atbolsta dīnastā vysu laiku struoduoju ar zemnīkim, redzieju kai cylvāki struodoj, sytās, ar kaidu gondarejumu jī tū vysu dora. Tai es pats ar kotru dīnu arviņ vaira i vaira jutu, ka maņ juoturpynoj aizsuoktais, jo maņ ite beja taida kai ‘svātdīnis saimisteiba’. Pa drupeišam augom i koč kurā dīnā beja juopījem lāmums, voi nu es struodoju olguotu dorbu, voi ari turpynoju atteisteit saimisteibu.”

Ari sīva Jūlija izsver, ka Aleksejam ir cīši svareigi saimnīkuot sovu seņču zemē. “Jis niu rauga atgiut tū zemi, kas ogruok pīderēja dzymtai. Sastajā paaudzē niu ite teik struoduots. Viesturiski ite beja pusmuiža i eipašumā beja ap tykstūšu hektaru, bet godu gaitā vyss beja izpuordūts, atdūts i zaudāts par kapeikom. Jis niu, tykstūšys tierejūt, rauga tū vysu dabuot atpakaļ.”

Aleksejs atkluoj, ka saimnīceiba daudzi izdarejuse, ari pasasokūt vysaidim projektim, kas tyka i teik realizāti.

“Saprūtams, vajadzēja izmontuot ari vysys tuos īspiejis, kurys mums snēdz Eiropa. Tyka uzraksteiti projekti, īguoduota tehnika i leidz ar tū ari preteimā vajadzēja īvāruot koč kaidus nūsacejumus, atsateisteit i pīruodeit komisejom, ka myus ir vārts atbaļsteit. Leidz ar projektim auga ari saimisteiba. Var saceit, ka itī projekti sovā ziņā disciplinej saiminīku. Vysi tī projekti dūd ari koč kaidu redziejumu iz prīšku. Cikom tu jūs roksti, tu ari pats sapŗūti, iz kureini tu ej.”

Itū šaļt saimisteibys puortykys puorstruodis apmāri nav leli i jī poši spiej izsekuot leidza kotram tuos procesam, tūstorp ari kluotīnē uzjemūt interesentus i izruodūt saimnīceibu. “Mes aicynojam gostūs pi seve i, stuostūt par saimisteibu, par tehnologejom, biologiskuos saimnīkuošonys byuteibu, raugom sovā veidā puorlīcynuot cylvākus, kab jī pīdūmuotu pi sova uztura.”

Iz z/s “Liepkalns” produkcejis īpakuojumim radzami latgaliski nūsaukumi – zalī dryči, “Madaļonka”, “Jezups” i “Juoneits”. Vaicuoti par tū, voi latgalīšu volūdys izmontuošona proukcejis nūsaukumūs veicynoj puordūšonu, Aleksejs pīzeist, ka nui. “Struodoj, saciesim nu turisma pusis. Tys pīsaista pierciejus, gon vītejūs, gon puornūvodnīkus. Ka cylvāks nanūpierks tū kai produktu sovam goldam, tod nūpierks kai duovonu.”

Aleksejs stuosta, ka puortykys puorstruode aizsuokta ari deļtuo, ka kotru godu juosasaskar ar izaudzātuos ražys realiziešonys problematiku. “Cenys ar kotru godu palīk arviņ leidzeiguokys konvencionalajom, deļtuo tys ir vīns nu golvonūs īmesļu, deļ kuomes tū dorim. Raugom, lai tī izaudzātī gryudi palīk saimisteibā i daboj sev pīvīnuotū vierteibu. Zemis ari vaira napalīk, i ir juorauga nu kotra hektara nūpelneit vaira… Pādejī nūtykumi paruodeja, ka vīnā breidī var nūtikt tai, ka paliksim piļneigi izolāti. Ir juoatbolsta sovejūs, juodora tai, lai tei vaļsts nu īškīnis byutu stypruoka i mes nabyutu atkareigi nu cytu.”