Ar žurnālisti i literati Ingu Kaļvu-Mininu runuosim par juos darbeibu, popularizejūt Latgolu i latgalīšū literaturu, kulturu i iteinis cylvākus vysaidūs rokstūšajūs medejūs. Jau desmit godu Inga struodoj laikrokstā „Vietējā Latgales Avīze”, taipat jei roksta ari „Latvijas Avīzes” dalykumam „Kultūrzīmes”. Sovpus nu pārnejuo goda apreļa jei Latvejis Rakstnīku savīneibys mienešroksta „konTEKSTS” jaunajā rubrikā „Olūtuošona”, atsaver iz Latgolys kulturvidi i viestej par tuos aktualitatem.

„Tys beja cīšī jauks pīduovuojums nu redaktoris Sandrys Ratniecis, kod jei saceja, ka varbyut es i Sandra Ūdre varātu reizi mienesī, vīnu mienesi vīna, ūtru mienesi ūtra atsavērt i pastuosteit par nūtikumim, kas mieneša laikā ir bejuši Latgolā. Literatura, kulturys procesi, volūda… Tī, prūtams, tod ir svareiguokī momenti nu muna skota punkta. Stuostu par tū, kas maņ ir redzejīs vierteiguokais. Tī es rokstu latvīšu literarajā volūdā, bet, ka ir kaidi forši citati i tai, ta es vysod raugu tūs īlikt ari latgaliski.”

Vīna nu problemu, veidojūt medejim saturu latgaliski, ir tei, ka tryukst žurnalistu, kuri jādz pareizi raksteit latgaliski. Ari Inga pīzeist, ka itys vēļ arviņ saguodoj zynomys gryuteibys, vys vēļ pi daudzi kuo juopīdūmoj i seve juopuorbauda.

„Tod, kod es rokstu latgaliski i ka es naasu par kaidu vuordu puorlīcynuota, es vysod pasaveru ari lakugā (Latgalīšu kulturys zinu portals lakuga.lv), tī tān ir daudzi foršu materialu, kai kuru vuordu pareizi raksteit i kur goduos pīlaist vysvaira klaidu. Maņ redzīs, ka tu roksti latvīšū literarajā volūdā, tu tok ceņtīs raksteit bez klaidu, tod ari ar latgalīšu volūdu ir tys pats. Ka tu roksti latgaliski, tev ir juosaceņš tū dareit bez klaidu. Tai kai maņ ir ari lela dorba pīredze kai korektorei, tod ari itei muna bagaža maņ līk pīdūmuot pi tuo, kū es soku i rokstu. Vēļ jau es tikai vuicūs.”

Vaicuota par tū, voi jei saskota zynomu problematiku ar publiciešonuos īspiejom latgaliski rokstūšim autorim, Inga atsasauc iz naseneju sarunu ar nūslāpumainū latgalīšu autori Mareju Dzeislu.

„Marejai Dzeislai beja tads cīšī lobs citats. Pyrma tam jei saceja, ka Dzeislai nav gruomotys, nav nūpītnu publikaceju, bet jai ir sovs Facebook profils. Tys vīnkuorsi ir cyts veids, kai literatura tān dzeivoj. Ka īīt Marejis Dzeislys profilā, tī ir juos dzejūli, kas līk aizadūmuot i padūmuot raksteitū, tī izreiz ir ari komentari i tai. Izreiz sasalīk tys vyss stuosts par dzejūli i tymā īlyktū dūmu.”

Te gon Inga Kaļva-Minina izsver, ka tys nikaidā veidā namazynoj gruomotu vierteibu, tuos vystycamuok beja i byus.

„Es asu gruomotu pīkritiejs, maņ cīši pateik gruomotys, kurys nav elektroniskys, bet ir cītūs, īspīstūs vuoceņūs. Tu vari aptausteit, izjust tū smaržu i ari burtus redzēt. Tī koč kai vyss cytaižuok. Es dūmoju, ka gruomotys napagaiss, vīnkuorši tī socialī teikli niu ir tys, bez kuo mes navarim, i tys ir veids kai sevi popularizēt. Teve var pamaneit. Tei ir sova veida publicitate.”