Pārnejuo gods golā igauņu keramikys muoklinīka Sandera Raudsepa izstuode “Nāvīga vēlme nonākt pēcnāvē” izsauce vysā lelu ažiotažu i nūteikti pīsaisteja lelu uzmaneibu Daugovpiļs Marka Rotko muokslys centram, tai kai Daugovpiļs dūmis amatpersonys pīpraseja izjimt treis muokslys dorbus nu izstuodis. Izjimtī dorbi beja provokativi, ar religiskim simbolim i cylvāku dzymumorganim. Piec ituo gadīņa sabīdreiba koč kaidā ziņā sasadaleja – vīni, kuri tur, ka muoksla nav cenzejama i tai ir juobyut dažaidai, i ūtri, kuri iz muokslu vys tik verās car konservativuoku skotu.
Sevkurā gadīnī runa ir par myusu dīnu laikmeteiguos muokslys byušonu izstuožu zālēs, ari regiona izstuožu zālēs, i, saprūtams, runa ir par tū, voi asam gotovi itaidai muokslai, voi gribim i varim tū pījimt i saprast kai muokslu i cik tod vysā regionā cylvāki pazeist laikmeiteigū muokslu i gotovi tuos saprasšonai.
Raidejumā “Latgolys stuņde” par itū iz sarunu aicynuoti Latgolys regiona muokslinīki – metalmuokslinīks, Rēzeknis Muokslys i dizaina vydsškkolys pedagogs Norberts Kudiņš, gleznuotuojs Aivars Jurančs, keramike, Daugovpiļs Nūvodpietnīceibys i muokslys muzeja Muokslys nūdalis vadeituoja i Daugovpiļs muokslinīku asociacejis dalineica Mairita Folkmane, kai ari grafike, gleznuotuoja, tekstilmuokslineica i ekspoziceju i izstuožu kuratore Leivuona Stykla i amatnīceibys centrā Kristīne Lipkova.