Izalauzšonys ustoba, īrokstu studeja, kopeja grauzdātova, multimedialys ekspozicejis i festivali – tei ir atsevišku likvidātūs školu Latgolā – Upītē, Leņdžūs i Lūznovā – jaunuo dzeive. Jau vairuokus godus Latvejis izgleiteibys sistemys optimizacejis dīnys parādā vīns nu suopeiguokūs punktu ir školu likvidaceja. Ari 2022. goda plāns kūpā ir reorganizēt 50 dažaida veida izgleiteibys īstuodis, nu kurūs 25 školys pīdzeivuos sliegšonu voi apvīnuošonu. Latgolā itymā godā teik slāgtys pīcys školys.


Itys lāmums īrosts roda vairuokus vaicuojumus kai par tū, kū dareit ar školys sātom, tai ari, kai tys ītekmej vītejū kūpīnu i vītys atteisteibu, nu nareši taišni školys likvidaceja ir pyrmais atspierīņs vītys transformacejā.
Itūreiz pīduovojam sarunu festivalā LAMPA itūgod organizātū diskuseju “Paļdis nūvodam, ka aizslēdze školu!” īpasazeistūt ar treis Latgolā slāgtūs školu “dzeivisstuostim” – kai tuos dabuojušys cytu izmontuošonys veidu i tykušys par vītejuos kūpīnys jaunajim centrim. Itūs stuostu mierkis ir īdvesmuot ari cytys Latvejis regionu vītys, kuruos skuorušys školu likvidaceja, dūmuot, radeit i meklēt veidus, kai skumais lāmums var reideit pozitivys puormainis.


Taipat skaidrojam, kai slāgtūs školys sātu “īdzeivynuošonys” procesu var atteisteit, pauotrynuot voi ari nūbremzēt pošvaļdeiba.


Sarunā pīsadola bīdreibys “Upītes jaunīšu folkloras kūpa” vadeituojs Andris Slišāns, KUUP kopeja grauzdātovys saiminīks Oskars Maculevičs, Rēzeknis nūvoda Lūznovys muižys puorvaļdneica Iveta Balčūne i Ludzys nūvoda dūmis prīšksādātuoja vītineica Ināra Silicka.

Diskuseju sarunu festivalā LAMPA Ciesīs organizēja Latvejis Radejis Latgolys studeja, bīdreiba “LgSC” i latgalīšu kulturys ziņu portals lakuga.lv.